Tarantella All'Acqua Pazza Testo

Alla repubblica 'e Triccaballacco
bùnghete bànghete ndringhete ndrà!
E alla salute di Cicci Bacco
zùghete zùghete e llariulà!

Nu sabbato 'e luglio d"o mare d"a Puglia
abbascio Coròglio arriva na treglia
ch'era figlia 'e nu boss 'e Marsiglia
e ssuccerette nu parapiglia.
Pecchè 'a treglia cu 'o sole che squaglia subbito subbito se scummoglia
e carenno 'a vestaglia 'e ciniglia
j' che marmaglia abbascio Coròglio!

Jette 'o scunciglio e nu bellu fravaglio,
nu capodoglio cu tutt"a famiglia,
na cunchiglia, na còzzeca 'e scoglio
quinnice purpe e nu paro d'auglie.
E nu rancio ca mmiez"e ttenaglie
teneva 'a coppola 'e n'ammiraglio,
pisce cu 'a botta e pisce 'e serraglio,
nce jette pure nu pesce cacaglio.
"Che meraviglia! (lle dice 'o scunciglio)
N'ora 'e battaglia tu quanto te piglie?
Bella zandraglia scinne d"oscoglio,
comme si bbona, comme te voglio!
Si te piglie stu ricco scunciglio
te faccio pure 'a pelliccia 'e cuniglio
e tte porto ogni sera 'o Cerriglio
addò se canta 'O barbiere 'e Siviglia. E ssi me nacglio abballanno 'a quadriglia,
m'agliotto subito chella pastiglia,
chella pastiglia ca comme t"a piglie
ciuccio ch'arraglia te fà addeventà!
E ssi me nacglio abballanno 'a quadriglia,
m'agliotto subito chella pastiglia,
chella pastiglia ca comme t"a piglie
ciuccio ch'arraglia te fà addeventà!"

Ma cu 'a treglia 'o scunciglio nun quaglia
pecchè ammore nun vò 'o portafoglio.
Pecchè 'a freccia 'e Cupido te coglie
quanno 'o core è nu tirabersaglio.
D"a pareglia d"e pisce 'e Coròglio
'a treglia spànteca p"o fravaglio,
nu marpione, na faccia 'e canaglia
ca t'abbaglia, te spoglia e tte mbroglia!

Ma 'o destino è na botta 'e mitraglia,
nu fenucchio ca nun se scummoglia.
E' na rota ca gira e sse ncaglia,
na matassa ca nun se sgravoglia.
A tre miglia d"o mare 'e Coròglio
'o Vesuvio pripara 'o scumpiglio:
fa nu rutto e lle zompa 'o stuppaglio
comme 'o suvero 'a copp"a butteglia!

E accussì chillu scoglio 'e Coròglio
addeventa na vera gratiglia
pe nce arròstere 'o bello fravaglio
abbracciato pe ssempe cu 'a treglia.
E currette 'on Anzelmo Tartaglia
nzieme a zi' prèvete Peppe 'o Sciuoglio
ca dicette na messa 'e curdoglio
ncopp"o scoglio d"a povera treglia.

E tutt"e figlie d"e pisce fravaglio,
nzieme cu 'e figlie d"e pisce scunciglie
mo raccontano 'o cunto d"a treglia
a tutt"e pisce ca passano 'a llà!
E tutt"e figlie d"e pisce fravaglio,
nzieme cu 'e figlie d"e pisce scunciglie
mo raccontano 'o cunto d"a treglia
a tutt"e pisce ca passano 'a llà!